SO KA SADINE, ODOVA KA BARJOL

Svako manuš ki akija dunjaja isi olje piklji sudbina. Điko đanela te sivel,

điko đilabi šukar, điko tano baro biznismeni, a me - me mangava diso te ačhavav amare Romenđe.

Diso so šaj jačhencar dikhen, najencar te takinen hem vileja te osetinen!

MAGAZIN ROM

O Magazin Rom tano jekh kvartalno hem badihava internet-magazin. Fokus tane o Roma, a i primarno idea tani te vazdel pe e Romengoro interes e čitibase. O teme ko magazin tane kultura, integracia, nevipe, informacia, svakodivesoro đandipe, muzika, sastipe, ajgara, historia…

O moto kotar o magazin tano te pisini pe odija čhib sar so vačeri pe čhere! Zalo amari Romani čhib, jekh artikli isi hem ki Švedsko čhib, sebepi amen o Roma mangaja kokri te bičhala i korektno informacia kotar e Romengiri historia, čhib, kultura, adetia… Ađahare mangaja te probina te perava o stereopitija hem te čhinava i diskriminacia premalo Roma so isi ko avdisutno društvo. Đi akana but gađe pisinđe, vačerđe, prezentirinđe hem đilabđe kotar o Roma, ama retko keda ikljislo hine ko šukar. Amari filozofia tani, so niko na penđari e Rome pošukar kotar o Rom!

O Magazin Rom tano bizo profiti! Me kontaktirinđum fantastična manušen kola bizo problemi prihvatinđe akava izazov. Sarine biđidinđe akija idea hem sarine aceptirinđe te pisinen badihava. Ama, sa aver so valjanđa hine te platini pe, sar ko primer o materiali, o domeni,

o programija hem aver - sa me kokri platinđum.

Pobuter informacia isi akate: Magazin Rom

ROMANI ARLI ALFABETA

Romani čhib tani but barvalji čhib! Ama, sebepi e butberšengiri diskriminacia, o čorolipe hem i migracia, o Roma na hine oljen vakti te pisinen piklji čhib, nego i čhib arakhlja pe, transferinđa pe hem barjačerđa pe mujea kotar generacia đi ki generacia. I Romani čhib tani samo jekh termini baš o sa

o Romane dialektija! Sebepi, ako dikhaja o čačipe - sa o Roma, čhere vačerena samo poklo dialekti. A, Romane dialektija isi but. Akava projekti počminđum ađahare so phirđum kotar mahale, konferencije, bijava hem vačerđum hem e phurederencar, a hem e ternencar. Tegani konstatirinđum so o Kalderaši na haljola e Arlija, o Arlija na haljola e Lovare hem ađahare sa ko krugo... Odoljese pelji i odluka te čerel pe alfabeta samo e Arlijenđe -

Romani Arli Alfabeta. Akija eksploracia doljinđa duj berš hem sa o harči plantinđum kokri. I Romani Arli Alfabeta isi ola 32 bukve. Zali slika, isi hem video kuri šaj te dikhen e čhavoren sar vačerena o bukve. Takin akate: Video

ROMANO TURNIRI 2017

7. April 2017, hine amen jekh fudbalsko turniri ki

Mjölby. O interes hine but baro!

14 ekipe, prekalo 200 igračia hem totalno koro 500 manuša hine ki sala đi ko 03:00 o sati račate. Akava turniri organizirinđa o Arli Centar, a partneria hine i Mjölby komuna,

o Bostadsbolaget hem o Norrköpings Romer.

Glavna koordinatoria hem o sebepi sose

akava turniri ulo jekh but baro suksesi tane o

Sebastijan Hasani, o Sefet Sadiki hem me.

Ko turniri hine hajbe, pijbe, čhelibe, asajbe

- sa badihava! Amaro buđeti ko turniri hine

5 000 krune, ama i sloga hem o pozitivno cilji

čerđa te dičhol sar 50 000 krune. Sarine amen ičereja imizi so akava turniri ka ovel jekh tradicia. Svako berš te ova ko jekh than!

Akate šaj te dikhen o dokumentarno filmi: Video

KNJIGE KI ROMANI ČHIB

Miklji najbari baht tani ked dikhava e Romane čhavoren sar čerena čefi ked dobinena peklje Romane knjige ko vasta. Akala trin knjige tane

e čhavorenđe so đana ki 1-3 klasa.

Hajde te sikljova Romani Arli Alfabeta 1

ISBN: 978-91-982463-0-8

Hajde te sikljova Romani Arli Alfabeta 2

ISBN: 978-91-982463-1-5

O đando Lio

ISBN: 978-91-982463-2-2

ROMANI AJGARA

Buti - čhere, buti - čhere... bisterđam te asa! Vičinđum ko meklje amala kotar Norrköping, ko Almir Sali hem ko Seferim Murina te čeda amen 20-30 amala hem te asa celo rat. O Almiri vačerđa so ov šaj te spremini ajgara bizo problemi najhari jekh sati, a o Sefo vačerđa so šaj te arakhi jekh sala so šaj te resel đi ko 100 manuša hem te prijavinen pe, sar koj mangela. Interes hine baro, a zalo asajbe hine hem hajbe hem pijbe. Amen hijam bare čefljije, sebepi but manuša ikljilje ki scena te čeren ajgara. But šukar nakhljam odija rat! Akate šaj te dikhen o video: Romani ajgara

SATIRA

Sar so šaj več đanena, i satira tani jekh žanri ki literatura koja koristini ironia hem sarkazm. Miklji satira prezentirinava ola prekalji grafika hem humoristika. I satira mangela te bičhali jekh poruka e narodose, te kritizirini jekh individa ja jekh grupa hem te marel muj…

O cilji kotar satira tano apsolutno samo humor, a na

te dukhavi ja te holjančeri đikas!

PARAMIZ

O internet than paramiz.net tano e čhavorengoro barvalipe. Amare Romane čhavore ko akava than šaj te khuven keda mangena hem badihava te čitinen dijekh paramiz. Zalo čhavore ko akava than šukar te khuven hem o jeri te čitinen peklje čhavorenđe dijekh paramiz angljeder o sojbe. Ama, akala paramiza šaj pana pobuter te pomožinen e sikavnen ki Romani čhib. O sikavne šaj barabar e čhavorencar ki škola te čitinen o paramiza hem palo odova te šaj te diskutirinen hem te čeren analize.

Akate šaj te čitinen dijekh paramiz: paramiz.net

100 PHRASES ENGLISH / 100 FRAZE ROMANI ČHIB (ARLI)

Ko prvo than mora te zahvalinav man me phralese, e Sefose (Seferim Murina) so pomožinđa man akija idea te čerav ola čačipe. Akava tikno edukativno video šaj te pomožini sarinen so mangena te sikljoven o "normalna" fraze ki Englesko ja Romani čhib. I idea realizirinđam ola ki jekh pizeria, kuri pomožinđa amen o mikrofoni kotar 100kr. Akaljea mangaja te mothova so na valjanena but bare pare, donacie, kancelarije hem studio te ačhava jekh šukaripe palo amende.

Akate šaj te dikhen o edukativno video: 100 fraze

BAHTALO BIJANDO DIVE

Avdije šužo dive, šužo dive, šužo dive.

E Liosor bijando dive, bijando dive, bijando dive.

Nek đivdini, nek hiljadini 909 berš.

Akate šaj te dikhen o video: Bijando dive

ROMANO LAFI

Bare čefjea publicirinđum o "Romano lafi", jekh aplikacia e Romenđe ko Google Play - Android. Akija aplikacia tani jekh čhelibe e Romane lafencar. Akava "app" šaj te koristinen o čhavore ki škola hem o pobare manuša te našaljen po vreme hari, ako oljenđe dosadno dijekhvar.

Celo aplikacia čerđum hem financirinđum kokri! Znači, palo mande nane nijekh referens grupa, državno institucia ja privatno fondacia. Akija aplikacia tani e Romenđe,

ki Romani čhib , Arlisko dialekti hem badihava!

Ko akava link šaj te huljaven i aplikacia: paramiz.net